Philip Weybourne, 40 ára gamall faðir frá bænum West Malling á Englandi, lést óvænt í miðju fjölskylduferðalagi í maí á þessu ári. Fjölskyldan hafði gert sér ferð til Orlando í Bandaríkjunum til þess að fara í skemmtigarðinn Disney World.
Þann 23. maí síðastliðinn lést Philip en fjölskyldan hafði á þeim degi ákveðið að taka því rólega í hitanum í Flórída. Síðar um daginn ákvað Philip að fara einn á bar til að fá sér nokkra drykki. Um tveimur tímum síðar var bankað á dyrnar hjá Dorlyn Weybourne, eiginkonu Philip, og henni tilkynnt að hann hafi verið fluttur með sjúkrabíl á spítala.
„Þegar ég kom á spítalann sá ég ekki eiginmanninn minn. Ég man bara eftir lækninum að segja mér frá dánartímanum,“ segir Dorlyn í samtali við Metro en Philip lést klukkan 20:06.
Þegar Dorlyn var tilkynnt um andlát eiginmanns síns var henni sagt að hann hafi fengið hjartaáfall. Ákveðið var þó að kryfja Philip og niðurstöður krufningar sýndu að hann hafði innbyrt fentanýl.
Óvíst er hvernig Philip innbyrti fentanýlið, það er að segja hvort hann hafi fengið sér það sjálfur eða hvort honum hafi verið byrlað því. Fentanýl er mjög sterkt verkjalyf, allt að hundrað sinnum sterkara en morfín.
Aðstoðardánardómstjórinn Catherine Wood segir að Philip hafi verið mjög heilbrigður maður, það sé ljóst að fentanýlið dró hann til dauða.