Bálreið móðir réðst á flugfreyjur og hótaði þeim lífláti í flugi með United Airlines frá San Francisco til Chicago í gær. Aðrir farþegar í fluginu náðu atvikinu á myndbönd og hafa birt þau á samfélagsmiðlum.

Málið hófst þegar móðirin öskraði yfir flugvélina og sagði að barnið sitt þyrfti að æla. Í kjölfarið stóð hún upp og öskraði „hvar er það?“ á flugfreyjurnar sem sögðu henni að setjast aftur í sætið sitt. „Við erum að lenda,“ segir ein flugfreyjan við hana en þá veittist móðirin að flugfreyjunni og setti hönd sína á háls hennar. „Ég mun drepa þig. Ég mun fokking drepa þig,“ heyrist hún segja við flugfreyjuna í myndbandinu en á meðan er barnið hennar grátandi.

Flight attendant assaulted on @united flight 476 that just landed in Chicago at @fly2ohare. pic.twitter.com/4ksmKl5PAC

— Peter Kondelis (@PeterKondelis) November 13, 2022

Móðirin lét sér þó ekki segjast og hélt áfram að valda usla í flugvélinni. Farþegi sem deildi myndbandi af atvikinu á TikTok segir að á meðan þessu stóð hafi móðirin látið út úr sér alls kyns bull. „Jesús kristur, frelsari okkar, var að fara að bjarga okkur,“ segir farþeginn að hún hafi meðal annars sagt.

@emily_jeannn Just had an interesting flight home. #united #candycrush10 #sanfrancisco #chicago ♬ original sound – Emily

Þegar flugvélin lenti loksins mætti lögreglan á svæðið og fylgdi mæðginunum úr vélinni. Talsmaður United Airlines hefur gefið út að ein flugfreyjan hafi þurft að fara í skoðun á sjúkrahúsi eftir atvikið. „Við erum þakklát starfsfólkinu okkar fyrir að hafa brugðist vel við þessum erfiðu aðstæðum og setja öryggi sitt og farþeganna í fyrsta sæti,“ er haft eftir talsmanninum í frétt Daily Star um málið.

Þá staðfesti Steve Rusanov, lögreglumaður í Chicago, að þrjú sem voru í flugvélinni hafi verið flutt á sjúkrahús eftir lendingu. Ekkert þeirra var þó alvarlega slasað.