En nú hefur ný rannsókn á þessum verkfærum kollvarpað þessu og þykja niðurstöður hennar mjög spennandi. Samkvæmt nýju rannsókninni þá eru verkfærin 450.000 til 550.000 ára gömul. Videnskab skýrir frá þessu.
Þetta er mjög merkilegt því þetta þýðir að verkfærin voru gerð áður en nútímamaðurinn kom fram á sjónarsviðið og þar að auki löngu áður en hann kom til Evrópu.
Peter C. Kjærgaard, prófessor í þróunarsögu og safnstjóri danska náttúrugripasafnsins, sagði að tímabilið, sem verkfærin eru frá, sé gríðarlega spennandi hvað varðar sögu mannkynsins. Um leið sé það eitt þeirra tímabila sem minnst er vitað um.
Nýja rannsóknin sýnir að það voru ekki nútímamenn sem gerðu verkfærin því þeir komu ekki fram á sjónarsviðið fyrr en fyrir um 300.000 árum. Um 55.000 ár eru síðan fyrstu nútímamennirnir settust að í Evrópu.
Þetta þýðir auðvitað að þeir sem gerðu verkfærin hafa verið af annarri tegund manna, Homo heidelbergensis sem var líklega forfaðir Homo sapiens og forfaðir neanderdalsmanna að sögn Kjærgaard.
Talið er að fyrstu heidelbergensis mennirnir hafi komið fram á sjónarsviðið í Afríku fyrir um 600.000 árum en það er þó ekki vitað með vissu og sumir vísindamenn telja að þeir hafi komið enn fyrr fram. Vitað er með vissu að þeir voru komnir til Evrópu fyrir um 500.000 árum.
Út frá þeim heidelbergensis, sem fóru frá Afríku til Evrópu, urðu neanderdalsmenn til en Homo sapiens varð til út frá þeim heidelbergensis sem urðu eftir í Afríku.
Talið er að Homo heidelbergensis hafi dáið út fyrir um 200.000 árum. Það þýðir að tegundin var til á sama tíma og Homo sapiens. Ekki er vitað hvort og þá hvernig samskipti tegundanna voru að sögn Kjærgaard.
Hann sagði að þetta sé mjög spennandi uppgötvun og að á næstu árum munum við vonandi öðlast meiri þekkingu á Homo heidelbergensis. „Þetta er rosalega spennandi. Þetta er gat í sögu mannkynsins sem við erum loksins að fara að fylla út í,“ sagði hann.
