Borgaryfirvöld í New York og yfirvöld í New York ríki hafa fallist á að greiða 36 milljónir dollara til Muhammad Aziz, sem er nú 84 ára, og erfingja Khalil Islam, sem lést 2009, vegna rangrar dómsniðurstöðu. Þeir voru fundnir sekir um morðið á Malcom X árið 1965.

Borgaryfirvöld hafa samþykkt að greiða 26 milljónir dollara vegna sakfellingarinnar, sem var röng, og yfirvöld í New York ríki munu greiða 10 milljónir. David Shanies, lögmaður Aziz og Islam, staðfesti þetta að sögn The Guardian. Hann sagði að tvímenningarnir og fjölskyldur þeirra hafi þjáðst vegna rangra sakfellinga þeirra fyrir rúmlega hálfri öld.

Hann sagði að samkomulagið sendi þau skilaboð að misferli af hálfu lögreglunnar og saksóknara valdi miklu tjóni og að það verði að vera á varðbergi og leiðrétta óréttlæti.

Dómari á Manhattan felldi dómana yfir Aziz og Islam úr gildi á síðasta ári í kjölfar þess að saksóknarar sögðu að ný sönnunargögn sýndi að vitnum hefði verið hótað og mikilvægum sönnunargögnum hefði verið haldið frá málarekstrinum.

Aziz og Islam, sem héldu fram sakleysi sínu alla tíð, fengu reynslulausn á níunda áratugnum.