Í skýrslunni kemur fram að sú ógn sem Dönum stafi af njósnum erlendra ríkja hafi aukist mjög á síðustu árum og að landið sé „aðlaðandi“ í augum ríkja á borð við Kína og Rússlands. Njósnarar erlendra ríkja eru sagðir hafa stundað „virkar njósnir“ gegn Danmörku, Færeyjum og Grænlandi. Þetta hefur orðið til þess að PET hefur lagt meiri áherslu á gagnnjósnir en áður.
PET segir að þessi ógn sé raunveruleg og viðvarandi. Hér sé um njósnir að ræða, reynt sé að hafa áhrif á fólk, það sé áreitt og reynt sé að komast yfir vörur, tækni og þekkingu á ólögmætan hátt. Einnig séu dæmi um morðtilraunir.
Markmið hinna erlendu ríkja er aðallega að styrkja eigin pólitíska, hernaðarlega og efnahagslega stöðu. Annað hvort með því að verða sér úti um mikilvægar upplýsingar eða með því að hafa áhrif á stjórnmálamenn og almenning. Auk Kína og Rússlands eru Íranir sagðir virkir á þessu svið og að önnur ríki láti einnig að sér kveða en þó í minni mæli.