Þann fyrsta maí árið 2004 yfirgaf Barry Coughlan krá eina í hafnarbænum Crosshaven á Suður-Írlandi. Hvorki hefur spurst né heyrst til hans síðan. Barry var 23 ára gamall, hraustur og duglegur ungur maður. Hvarf hans hefur allar götur síðan verið ráðgáta og meðal annars uppspretta fréttaskýringaþátta í sjónvarpi.
En fyrir þremur vikum fundust líkamsleifar Barrys og breskir fjölmiðlar greina frá því í dag. Rauðri Toyoyta fannst undan Hugh Coveney höfninni í Crosshaven. Um er að ræða sama bíl og Barry átti á sínum tíma. Rannsóknamenn írsku lögreglunnar hafa borið kennsl á líkamsleifarnar og úrskurðað að þetta séu líkamsleifar Barrys.
Það voru áhugakafarar sem voru að kafa fyrir utan umrædda höfn sem fundu bílflakið og líkamsleifarnar. Gerðist þetta þann 26. maí síðastliðinn. Kafararnir létu lögreglu vita sem skömmu síðar girti svæðið af og hóf að koma bílflakinu upp á land.
Ekki kemur fram í fréttum hvort álitið sé að andlát Barrys hafi verið slys, sjálfsvíg eða morð.