Á fyrsta ársþriðjungi fóru 36.100 manna ólöglega yfir ytri landamæri ESB en það eru þriðjungi fleiri en á síðasta ári. Mesta aukningin var á leiðum sem liggja um vesturhluta Balkanskaga og yfir mitt Miðjarðarhafið.
Tölur frá flóttamannastofnun SÞ, UNHCR, eru á sömu lund.
Þessarar aukningar hefur meðal annars orðið vart á Ítalíu en margir hafa komið sjóleiðis til eyjunnar Lampedusa. Fyrr í mánuðinum komu 1.400 manns þangað í 15 bátum. Fyrstu vikuna í maí komu 11.000 hælisleitendur og förufólk til Ítalíu en voru 4.000 fyrir ári.
Spánverjar finna einnig fyrir þessari aukningu, sérstaklega í Ceuta sem er spænskt yfirráðasvæði á norðurströnd Marokkó. Um 85.000 manns búa í bænum sem hefur ákveðna sjálfsstjórn en er eins og Melilla, sem einnig er á norðurströnd Marokkó, hluti af Spáni og þar með hluti af ESB. Á mánudaginn náðu nokkur þúsund manns að komast til Ceuta með því að synda þangað og notast við báta. Talið er að 6.000 til 8.000 manns hafi komist til Ceuta á mánudag og þriðjudag með þessum hætti. Von þeirra er að þetta opni þeim aðgang að meginlandi Evrópu. Spænska ríkisstjórnin hefur nú þegar sent 4.000 aftur til Marokkó. 200 hermenn og 200 lögreglumenn hafa verið sendir til að aðstoða 1.100 manna lið landamæravarða í Ceuta.
