Caroline Crouch, 20 ára móðir frá Bretlandi, var pyntuð til dauða fyrir framan 11 mánaða gamla dóttur sína og Charalambos Anagnostopoulos, eiginmann hennar, af þremur mönnum sem brutust inn á heimili hennar í Grikklandi. The Sun fjallaði um málið.
Mennirnir brutust inn á heimili þeirra klukkan 5 um nóttina og bundu eiginmanninn fastan áður en þeir pyntuðu Caroline til dauða. Charalambos, sem er 32 ára gamall, lifði árásina af en hann segir árásarmennina hafa komist undan með peninga og skartgripi. Mennirnir eru sagðir hafa tekið peninga og skartgripi að andvirði 2,3 milljóna í íslenskum krónum. Þá drápu mennirnir einnig hund fjölskyldunnar og létu hræ hundsins hanga af svölunum á húsinu.
Charalambos horfði á mennina pynda eiginkonu sína en þeir vildu komast að því hvar peningar og önnur verðmæti væru í húsinu. „Ég sá þrjá hettuklædda menn. Einn var hávaxinn. Þeir öskruðu og hótuðu á bjagaðri grísku,“ er maðurinn sagður hafa sagt við lögregluna. „Þeir bundu mig niður á stól og réðust svo á eiginkonuna mína.“
Eins og fyrr segir var 11 mánaða gömul dóttir þeirra einnig viðstödd en samkvæmt upplýsingum fjölmiðla á meginlandinu fannst barnið grátandi við hliðina á líki móður sinnar.
„Það virðist vera sem konan hafi verið kyrkt af mönnunum,“ segir yfirmaður lögreglunnar á svæðinu í samtali við The Times. „Við erum að bíða eftir niðurstöðu krufningarinnar en þá getum við séð hvort eða hvað var einnig gert við hana.“