Sex bækur eftir hinn ástsæla rithöfund Dr. Seuss verða ekki lengur framleiddar vegna rasískra og ónærgætinna mynda. Þetta kemur fram í tilkynningu frá Dr. Seuss Enterprises.

„Þessar bækur sýna fólk með hætti sem er rangur og særandi,“ sagði talsmaður Dr. Seuss Enterprises í samtali við The Associated Press um málið á afmælisdegi látna rithöfundarins í dag. „Það að taka þessar bækur úr sölu er aðeins partur af okkar skuldbindingu þegar kemur að því að sjá til þess að bækur Dr. Seuss sýni og styðji öll samfélög og allar fjölskyldur.

Ljóst er að ekki eru allir sáttir þegar kemur að þessari ákvörðun fyrirtækisins. Svo virðist vera sem mesta reiðin vegna ákvörðunarinnar komi frá hægri vængnum en þar eru einhverjir ósáttir og segja að um sé að ræða ritskoðun. Hinn umdeildi samfélagsrýnir Ben Shapiro er á meðal þeirra sem gagnrýna ákvörðunina.

„Ég kem aftur innan skamms, ætla að kaupa allar Dr. Seuss bækurnar fyrir börnin áður en bókabrennararnir ná þeim öllum,“ sagði Shapiro í kjölfar frétta af málinu.

Þá hafa bækur Dr. Seuss verið teknar úr lestrarátaki Bandaríkjanna. Mikið af fólki á hægri vængnum í Bandaríkjunum er reitt Joe Biden vegna þessa en hann er sagður hafa tekið bækur höfundarins úr átakinu.