Vísindamenn eru almennt mjög vissir um að plánetur sé að finna utan Vetrarbrautarinnar en enn sem komið eru það bara kenningar, það á eftir að sanna þær.
En nú hafa vísindamenn með aðstoð sérstakrar tækni borið kennsl á það sem þeir telja vera plánetu í vetrarbrautinni M51. Hún er í að minnsta kosti 28 milljóna ljósára fjarlægð frá Vetrabrautinni. Eitt ljósár er um 9,5 trilljónir kílómetra svo þetta er enginn smá spotti.
Við leit að plánetunni notuðu stjörnufræðingar bestu sjónauka bandarísku geimferðastofnunarinnar NASA og þeirrar evrópsku, ESA. Þeir mæla röntgengeisla úr geimnum og var leitin byggð á þeim. Sjónaukunum var beint að M51 vetrarbrautinni og fylgst með þegar magn röntgengeisla dróst mikið saman. Þá fór stjörnufræðingana að gruna að það gæti verið vegna plánetu. Kenningin gengur út á að hún hafi farið inn fyrir sjónarsvið sjónaukanna og þannig lokað á hluta geislanna.
Stjörnufræðingarnir telja sig vita að ef um plánetu er að ræða þá sé hún á stærð við Satúrnus. Hún er á braut um stjörnuna sína í 10 sinnum meiri fjarlægð en er á milli sólarinnar okkar og jarðarinnar. Það tekur hana 70 ár að fara einn hring um stjörnuna sína. Hún verður fyrir miklu magni röntgengeisla frá stjörnunni sinni og væri því óbyggileg fyrir okkur jarðarbúa.
Þar sem það tekur plánetuna 70 ár að fara einn hring um stjörnuna sína þá geta vísindamenn ekki gert nýjar rannsóknir, til að staðfesta tilvist hennar, á næstunni. Það verður að bíða í 70 ár. Þeir slá því ákveðnum varnagla við kenningu sinni og segja aðeins að ekki hafi fundist önnur skýring á þessu fyrirbæri.
Niðurstöður rannsóknarinnar hafa verið birtar í vísindaritinu Nature.
