Réttarhöld yfir Ghislaine Maxwell hófust í Bandaríkjunum í dag, en hún er ákærð fyrir að hafa lokkað barnungar stúlkur til að stunda kynlíf með vini sínum Jeffrey Epstein sem svipti sig lífi í varðhaldi á meðan hann beið þess að vera sóttur til saka fyrir barnaníð. Talið er að margir ríkir og áhrifamiklir aðilar séu með kvíðnir fyrir réttarhöldunum út af þeim upplýsingum sem Ghislaine býr yfir og gæti greint frá. Reuters greina frá.

Verjandi hennar tók til máls fyrir dómi í dag og benti á að skjólstæðingur hans væri nú látinn svara fyrir sakir annars einstaklings, barnaníðingsins Jeffrey Epstein.

„Ákæruliðirnir á hendur Ghislaine Maxwell eru hlutir sem Jeffrey Epstein gerði, en hún er ekki Jeffrey Epstein,“ sagði verjandi hennar, Bobbi Sternheim fyrir dómi á Manhattan í dag. Hann heldur því fram að nota eigi Ghislaine sem blóraböggul fyrir brot Epsteins.

Saksóknari tók einnig til máls og hélt því fram að Gishlaine hafi tælt stúlkur undir lögaldri fyrir hönd Jeffrey svo hann gæti misnotað þær kynferðislega. Hún, sem fyrrverandi starfsmaður og elskhugi Epsteins hafi sent ungum stúlkum gjafir á borð við undirföt og rætt um kynferðislega hluti við þær til að fá þær til að treysta sér áður en hún hvatti þær til að gefa Epstein erótík nudd.

Epstein og Gishlaine hafi svo gefið stúlkunum pening, eða boðist til að borga fyrir þær ferðalög eða menntun, fyrir að nudda Epstein naktar að fullu eða hluta. Epstein hafi svo í einhverjum tilvikum stundað sjálfsfróun á meðan eða snert kynfærin á stúlkunum. Hún hafi jafnvel verið viðstödd þegar brotin áttu sér stað. Saksóknari segir ljóst að Maxwell hafi spilað lykilhlutverk í brotum Epsteins.

„Hún notaði berskjaldaðar ungar stúlkur, ráðskaðist með þær og bauð þær svo upp til að vera kynferðislega misnotaðar,“ sagði saksóknarinn, Lara Pomerantz í dag. 

Verjandinn hélt því hins vegar fram að lögmenn hafi ráðskast með minningar þeirra stúlkna sem hafa sakað Epstein um kynferðisbrot í þeim tilgangi að sækjast eftir skaðabótum frá þeim Gishlaine og Epstein.

„Minningar dofna með tímanum og í þessu máli munið þið sjá að ekki bara hafa minningar dofnað heldur hefur verið ráðskast með þær með utanaðkomandi upplýsingum, stöðugum fréttum fjölmiðla og öðrum áhrifavöldum.“

Verði Gishlaine sakfelld fyrir meint brot á hún yfir höfði sér allt að 80 ára fangelsi en búist er við að réttarhöldunum, sem eru gífurlega umfangsmikil, ljúki ekki fyrr en á næsta ári.

Sjá einnig:  Í dag hefjast réttarhöldin sem ríka, fræga og valdamikla fólkið óttast