Eitt af geimförunum mun fara niður í gegnum þétt og heitt andrúmsloftið en tvö önnur munu fara á braut um plánetuna og nota háþróaðar ratsjár til að rannsaka það sem leynist undir skýjunum.
Á annan áratug hafa bandarísku og evrópsku geimferðastofnanirnar ekki sýnt Venusi mikinn áhuga en í síðasta mánuði tilkynntu þær um þrjár ferðir þangað á næstu árum. Markmiðið með þessum ferðum er að komast að því af hverju þessi systurpláneta jarðarinnar er svo ólík jörðinni okkar.
Þær eru svipaðar að stærð, svipað gamlar, uppbyggðar á svipaðan hátt og eru á braut um sömu stjörnuna. Áður fyrr var talið að undir þykku skýjalagi Venusar gætu verið höf eða skógar og því sendu bæði Bandaríkin og Sovétríkin geimför þangað á áttunda og níunda áratugnum.
En þær upplýsingar sem fengust með þessum geimferðum sýndu að undir skýjunum var hreint helvíti. Yfirborðshitinn reyndist vera 475 gráður og loftþrýstingurinn 93 bör en það er sami þrýstingur og á eins kílómetra dýpi í höfunum hér á jörðinni.
Sovésk geimför lentu á Venusi á áttunda og níunda áratugnum og náðu að senda smávegis af gögnum til jarðarinnar áður en þrýstingurinn eyðilagði þau. Meðal gagnanna var að þykk brennisteinsský umlykja plánetuna.
