Í yfirstandandi heimsfaraldri hafa stjórnvöld og alþjóðastofnanir, þar á meðal WHO, verði gagnrýnd fyrir að hafa brugðist of seint við faraldrinum og að hafa ekki deilt vitneskju sinni um veiruna með alþjóðasamfélaginu. Nú hafa rúmlega 3,5 milljónir manna látist af völdum COVID-19 á því rúma ári sem er liðið síðan heimsfaraldurinn braust út og þreytu gætir meðal almennings á faraldrinum og sóttvarnaaðgerðum.
Til að heimsbyggðin verði betur undir næsta faraldur búin ætlar WHO, í samstarfi við þýsk stjórnvöld, að opna nýja heimsfaraldursmiðstöð sem á að vara ríki heims við væntanlegum farsóttum og heimsfaröldrum.
Miðstöðin verður í Berlín og er henni ætlað að þróa aðferðir og leiðir til að fylgjast með og greina upplýsingar alls staðar að úr heiminum, meðal annars á að notast við gervigreind. Ætlunin er að miðstöðin aðstoði aðildarríki WHO og vísindastofnanir við að samstilla vitneskju sína og sjá merki um hugsanlegar farsóttir tímanlega.
„Eitt af því sem við höfum lært af COVID-19 heimsfaraldrinum er að heimurinn verður að gera betur í gagnagreiningu til að hjálpa stjórnmálamönnum að taka ákvarðanir um lýðheilsu,“ sagði Tedros Adhanom Ghebreyesus, forstjóri WHO, þegar hann kynnti verkefnið.
Hann sagði að nútímatækni geti hraðað nauðsynlegri greiningarvinnu. „Veirur geta dreift sér hratt en upplýsingar geta borist enn hraðar,“ sagði hann.
Miðstöðin verður opnuð í haust. Þýsk stjórnvöld hafa lagt henni til 30 milljónir evra en þýskir fjölmiðlar segja enn óákveðið hversu mikla peninga WHO og önnur aðildarríki stofnunarinnar láta af hendi rakna til verkefnisins.
Stofnunin verður ekki einhverskonar stjórnvaldsstofnun heldur upplýsingagátt sem veitir vísindamönnum aðgang að ýmsum verkfærum. Ætlunin er að opinberir aðilar og einkaaðilar komi að rekstri miðstöðvarinnar auk vísindastofnana.
