Hann komst í fréttirnar 2004 þegar hann fannst og spár gerðu ráð fyrir að hann gæti hugsanlega lent í árekstri við jörðina. Hann er 340 metrar í þvermál og því ansi stór loftsteinn. Talið var að hann myndi koma hættulega nærri jörðinni 2029 og aftur 2036. NASA sagði að hann myndi ekki lenda í árekstri við jörðina í þessi skipti en hætta væri á að það gerði hann 2068.
En nýjar rannsóknir og athuganir með stjörnusjónaukum hafa leitt í ljós að engin hætta er á árekstri 2068 og hefur NASA nú tekið loftsteininn af lista yfir loftsteina sem hætta stafar frá.
Í tilkynningu frá NASA kemur fram að nýjustu útreikningar sýni að engar líkur séu á árekstri næstu 100 árin.
Apophis fer fram hjá jörðinni í 32.000 km fjarlægð föstudaginn 13. apríl 2029 og þá mun vísindamönnum veitast gott tækifæri til að skoða hann betur. Þetta er ansi nálægt eða um tíundi hluti fjarlægðarinnar til tunglsins og nær jörðu en margir gervihnettir sem eru á braut í 36.000 km hæð.