Íbúar á Isle of Man geta horft til Írlands, Skotlands, Wales, Norður-Írlands og Englands. Í öllum þessum löndum er enn barist við veiruna skæðu með tilheyrandi sóttvarnaaðgerðum en í fámenninu á Isle of Man geta íbúarnir andað rólega, að minnsta kosti að sinni.
Þann 1. febrúar lýsti forsætisráðherra eyjunnar því yfir að tími sóttvarnaaðgerða væri liðinn og íbúarnir gátu því hent andlitsgrímunum frá sér og faðmast á nýjan leik og farið á barinn. „Það væri dónalegt að fara ekki inn. Þetta er frábært,“ sagði Peter Halsall, bargestur, við The Guardian á þessum merkisdegi.
En eyjan er ekki alveg laus við veiruna, nokkur virk smit voru um mánaðarmótin en þar sem þau höfðu ekki komið upp innanlands var ákveðið að aflétta sóttvarnaaðgerðunum.
Aðeins er rúmur mánuður síðan eitt innlent smit varð til þess að gripið var til harðra sóttvarnaaðgerða og með þeim tókst að ná stjórn á faraldrinum. Ofan á það bætist að yfirvöld eru á fullu að bólusetja eyjaskeggja. Bóluefnið kemur frá Bretlandi sem eyjan heyrir undir þrátt fyrir að hún sé með sjálfsstjórn. Allir íbúarnir eru breskir ríkisborgarar.
Þegar blaðamenn The Guardian ræddu við eyjaskeggja um afnám sóttvarnaaðgerða bentu þeir ekki aðeins á bóluefnin sem lykilinn að góðri stöðu því þeir sögðu staðsetningu eyjunnar og landafræði vera besta vopnið. Eyjan er aðeins 572 ferkílómetrar og þar búa aðeins 85.000 manns og því sé auðvelt að hafa yfirsýn yfir umfang faraldursins hverju sinni. Allir þeir sem koma til eyjunnar verða að fara í 14 daga sóttkví og fara þrisvar sinnum í sýnatöku á þeim tíma.
Yfirvöld beita einnig hörðum viðurlögum ef brotið er gegn sóttvarnareglum. Því fékk ungur Skoti að kynnast um miðjan desember þegar hann sigldi á sæþotu frá Skotlandi til eyjunnar til að heimsækja unnustu sína. Það komst upp um kauða og þurfti hann að dúsa í fangelsi í fjórar vikur.
434 smit hafa verið staðfest á eyjunni frá upphafi faraldursins. 25 hafa látist af völdum COVID-19.
