Donald Trump Bandaríkjaforseti gaf í dag til kynna að Bandaríkin verði tilbúin með bóluefni við COVID-19 sjúkdóminum í nóvember á þessu áru og jafnvel áður en gengið verður til forsetakosninga þar ytra sem munu eiga sér stað þann 3. nóvember næstkomandi.
Þessi yfirlýsing forsetans kom töluvert á óvart þar sem áður hafði verið reiknað með að mun lengri tíma tæki að fullklára bóluefni, og stangast því þessi fullyrðing á við allar yfirlýsingar sem hafa komið frá heilbrigðisstarfsfólki Hvíta hússins.
Trump var inntur eftir því hvort að hann teldi það honum til framdráttar í komandi kosningum ef bóluefnið væri tilbúið og þá svaraði hann. „Það gæti ekki sakað, En ég er ekki að þessu fyrir kosningarnar, ég vil bjarga mannslífum“.
Heilbrigðisstofnanir í Bandaríkjunum hafa gefið það út að enginn afsláttur verði gefinn í þróun bóluefnisins til að flýta fyrir tilvist þess. Heilbrigðisráðherra Bandaríkjanna, Alex Azar, hefur neitað því að þróun bóluefnisins sé orðin pólitísk og vildi ekki gefa upp hvort hann hefði trú á því að bóluefnið yrði tilbúið fyrir kjördag.
Trump gengur nú hart eftir því að lífið í Bandaríkjum komist aftur í sinn vanagang og að skólar verði opnar að nýju. Fer hann fram á slíkt jafnvel þó að enn láti að meðaltali þúsund Bandaríkjamenn lífið vegna COVID-19 á degi hverjum.
Trump vakti einnig athygli í gær þegar samfélagsmiðlar ritskoðuðu fullyrðingar hans um að börn væru ónæm fyrir sjúkdóminum og var ritskoðun sú réttlæt með þeim rökum að fullyrðingar forsetans væru skaðlegar fals-fréttir.