Heilbrigðisyfirvöld í Suður-Kóreu hafa staðfest að 51 sjúklingur, sem höfðu smitast af COVID-19 og náð sér, hafi greinst aftur með veirunar. Staðfest hafði verið tvisvar sinnum með sýnatöku að fólkið hefði náð sér af sýkingunni en þriðja sýnatakan sýndi að veiran var aftur til staðar.

Yonhap fréttastofan skýrir frá þessu. heilbrigðisyfirvöld segja að allir sjúklingarnir séu frá Daegu, sem er fjórða stærsta borg landsins, og Gyenongsang héraðinu. Allir voru í einangrun á meðan sjúkdómurinn gekk yfir.

Jeong Eun-kyeong, forstjóri smitsjúkdómastofnunar landsins, segir að langlíklegast sé að veiran hafi legið í dvala í frumum og hafi síðan virkjast á nýjan leik. Telja yfirvöld að fólkið hafi ekki smitast á nýjan leik. Frekar rannsóknir eru nú hafnar á sjúklingunum til að hægt sé að ganga úr skugga um að veiran hafi virkjast á nýjan leik.