Mörg hundruð sjúkraflutningamenn eru frá vinnu því þeir eru veikir og neyðarlínan hefur ekki undan að svara símhringingum frá fólki sem þarfnast aðstoðar. Þetta hefur Reuters eftir heilbrigðisstarfsfólki í borginni.
Um átta milljónir manna búa í New York en borgin er gríðarlega þéttbýl og smitleiðir því margar. Sjúkraflutningamenn óttast að heilbrigðiskerfi borgarinnar muni hrynja algjörlega saman. Um 20 prósent sjúkraflutningamanna eru nú frá störfum vegna veikinda en margir þeirra eru smitaðir af COVID-19. Tveir þeirra eru í öndunarvélum.
Ofan á þetta bætist að neyðarköllum fjölgar stöðugt. Á fimmtudaginn bárust rúmlega 6.000 símhringingar til Emergency Medical Service, sem er neyðarlínan í New York, að sögn Vincent Variale formanns stéttarfélags sjúkraflutningamanna.
„Við höfum slegið öll fyrri met.“
Sagði hann.
Sjúkraflutningaþjónustan verður að sjá um flutninga á gríðarlegum fjölda COVID-19 smitaðra auk fólks með aðra sjúkdóma og vegna slysa. Álagið er farið að segja til sín, bæði andlega og líkamlega. Þeir sem svara í síma hjá neyðarlínunni segja álagið vera slíkt að þeir komast ekki á salernið.
„Ef þetta heldur svona áfram eigum við von á að sjá lík á götum úti.“
Sagði Variale.