Fimm stærstu „nuddstofur“ (vændishús) Kaupmannahafnar lokuðu strax í upphafi faraldursins og sárafáar vændiskonur eru að störfum á götum úti þessa dagana. Samkvæmt umfjöllun BT kemur þetta verst niður á konum sem standa illa að vígi félagslega.
Við venjulegar aðstæður eru mörg hundruð auglýsingar um „nuddþjónustu“ í Ekstra Bladet daglega en nú eru þær sárafáar, fingur beggja handa duga til að telja þær.
Að sögn „Estelle“, sem er talskona samtaka kvenna í kynlífsiðnaðinum, þá eru margir karlar sem gjarnan vilja kaupa vændi þessa dagana en það séu aðeins þær vændiskonur, sem eru verst settar félagslega, sem séu starfandi.
Reden í Kaupmannahöfn, er athvarf fyrir vændiskonur, og þar á bæ sér starfsfólkið mikla fækkun vændiskvenna sem eru að störfum þessa dagana. Götuvændi heyrir nær algjörlega sögunni til að sögn talsmanns Reden. Nokkrar danskar vændiskonur, sem tilheyra samfélagi fíkniefnaneytenda á Vesterbro, eru enn að störfum en annars er lítið um vændi.
Ekki er vitað með vissu hversu margar vændiskonur eru í Danmörku en hjá Reden er talið að þær séu um 3.000 og er þá miðað við upplýsingar athvarfsins og auglýsingar vændiskvenna.
