Á fimmtudag í síðustu viku sendi bandaríska alríkslögreglan FBI viðvörun til lögregluyfirvalda í New York um að öfgasinnaðir kynþáttahatarar hvetji nú stuðningsmenn málstaðarins til að dreifa COVID-19 veirunni sem víðast, þó aðallega til lögreglumanna og gyðinga.

ABC News skýrir frá þessu. Samkvæmt frétt ABC eru öfgasinnar á borð við nýnasista og aðra sem trúa á yfirburði hvítra að hvetja stuðningsmenn sína til að nota úðabrúsa til að úða líkamsvökva á lögreglumenn sem eru að störfum á götum úti. Í viðvörun FBI kemur einnig fram að öfgasinnar séu hvattir til að gera það sama við gyðinga með því að fara á staði þar sem gyðingar safnast oft saman, til dæmis markaði, skrifstofur stjórnmálamanna og flokka, verslanir og staði þar sem þeir iðka trú sína.

Talsmenn FBI hafa ekki viljað tjá sig um viðvörunina.

Á mánudaginn sendu yfirvöld í New Jersey frá sér viðvörun um að hópar öfgasinna noti internetið til að afla nýrra félaga með því að höfða til ótta fólks vegna heimsfaraldurs COVDI-19. NBC skýrir frá þessu. Innlendir og erlendir hópar öfgasinna eru sagðir hafa hvatt stuðningsmenn sóina til að ráðast gegn minnihlutahópum og innflytjendum til að valda ringulreið í samfélaginu. Nýnasistar eru sagði nota heimsfaraldurinn til að styðja við kenningu sína um að með því að valda ringulreið sé „hægt að hraða nauðsynlegu hruni samfélagsins svo hægt verði að byggja kynþáttahreina þjóð upp í framhaldinu“.