Í nýrri bók sinni, Hunting Killers, segir Williams-Thomas að sú staðreynd að slökkt var á mikilvægri eftirlitsmyndavél þegar Madeleine hvarf geri að verkum að málið muni væntanlega aldrei leysast. Sá sem nam hana á brott muni væntanlega komast upp með afbrotið.
„Ránið á Madeleine McCann myndi ég setja í flokk óleysanlegra mála.“
Segir hann og bætir við:
„Ég held að Madeleine hafi verið fórnarlamb tækifærissinnaðs afbrotamanns og ekki hafi verið um skipulagt mannrán að ræða. Hún gekk út úr íbúðinni og rakst á þennan aðila. Málið hefur ekki verið leyst, einfaldlega vegna þess að slökkt var á mikilvægri eftirlitsmyndavél en það þýðir að ekki er hægt að bera kennsl á þann sem tók Madeleine.“
Hann segir að þrátt fyrir að foreldar Madeleine og margir aðrir vilji gjarnan fá svör við hvað gerðist maínóttina 2007 þegar Madeleine hvarf þá sýni tölfræðin að málið verði líklegast aldrei upplýst. Hún var þriggja ára þegar hún hvarf. Hún var í fríi með foreldrum sínum og systkinum í Portúgal. Börnin voru skilin ein eftir í sumarleyfisíbúð á meðan foreldrarnir fóru á nálægan veitingastað með vinum sínum.
„Hinn sorglegi raunveruleiki er að líkurnar á að Madeleine sé enn á lífi eru ótrúlega litlar. Því miður er það svo að í nær öllum málum þar sem ókunnugir ræna börnum eru börnin dáin innan 24 klukkustunda.“