Fertug kona var í síðustu viku dæmd í tveggja og hálfs árs fangelsi af undirrétti á Friðriksbergi í Kaupmannahöfn. Hún var fundin sek um rúmlega hundrað fjársvik á netinu.

Konan, sem heitir Laura Luna Gallegos, komst yfir NemId-upplýsingar, sem eru rafrænar auðkenningar í Danmörku, og stolin greiðslukort. Þetta notaði hún til að taka lán, í nafni annarra, hjá ýmsum lánastofnunum.

Hún millifærði meðal annars háar fjárhæðir á reikninga hjá spilavítum á netinu og eyddi þeim í fjárhættuspil hjá þeim. Einnig notaði hún stolin greiðslukort til að versla á netinu.

Þetta gerði hún á árunum 2017 til 2019.

Hún var ákærð fyrir 173 brot, sem snerust nær öll um fjársvik á netinu.