Ástæðan er að í Svíþjóð gilda ekki eins strangar reglur um fjölda þeirra sem mega koma saman hverju sinni. BT skýrir frá þessu og hefur eftir Behroz Amzehi, sem á eitt stærsta samkomuhúsið í Malmö, að um 12 Danir hafi hringt í hann eftir að nýju reglurnar tóku gildi og viljað færa brúðkaupsveislur sínar til Malmö.
Hann sagði að aðallega væri um að ræða fólk sem er ættað frá Afganistan, Íran og Arabaríkjum.
„Þeir vildu vita hvort hægt væri að halda brúðkaupsveislu með skömmum fyrirvara og spurðu um verðið. Það var eins og þeir væru að hringja á nokkra staði til að fá verðtilboð. Ég gerði þeim tilboð og einn tók því,“ er haft eftir honum.
Fyrir fjórum vikum hélt dönsk fjölskylda, af afgönskum ættum, 200 manna brúðkaupsveislu hjá Amzehi.
„Þetta var veisla þar sem gestirnir komu frá Danmörku og Svíþjóð. Fjölskylda, vinir og skólasystkin samankomin,“ er haft eftir honum.
Vegna kórónuveirufaraldursins var handspritt á borðum og gerð krafa um að fólk héldi eins metra fjarlægð sín á milli en Amzehi sagði að í raun hafi sú krafa ekki verið virt allan tímann.
„Reglurnar segja að það eigi að halda ákveðinni fjarlægð á milli en fólk fer nær en það þegar það situr og borðar og þegar það dansar,“ sagði hann.
Talið er að hátt hlutfall þeirra smita sem hafa komið upp í Danmörku í annarri bylgju faraldursins megi rekja til fjölmennra samkoma og því voru strangar fjöldatakmarkanir settar.
Amzehi sagðist telja að fimm eða sex af þeim sem hann ræddi við hafi ákveðið að halda veislurnar sínar í Malmö en vissi jafnframt um eina fjölskyldu sem hætti við af því að gestirnir vildu ekki fara til Svíþjóðar.
