VG skýrir frá þessu. Segir miðillinn að Breivik, sem hefur raunar breytt nafni sínu í Fjotolf Hansen, hafi fengið heimsókn í hámarksöryggisklefa sinn í Skien fangelsinu skömmu fyrir jól. Lögmaður hans hefur eftir Breivik að þetta hafi verið góð upplifun.
Í upphafi afplánunarinnar heimsótti móðir hans hann öðru hvoru en þær heimsóknir fóru alltaf fram í heimsóknarherbergi þar sem þau voru aðskilin af glervegg. Eftir að hún lést 2013 hafa einu samskipti hans við annað fólk verið við starfsfólk fangelsisins þar sem hann er vistaður á hámarksöryggisdeild.
Breivik höfðaði mál á hendur norska ríkinu 2015 og sagði yfirvöld beita hann ómannúðlegri og niðurlægjandi meðferð í fangelsinu. Undirréttur tók að hluta undir málflutning hans en áfrýjunardómstóll var á öðru máli og sýknaði ríkið. Hæstiréttur og Mannréttindadómstóll Evrópu hafa hafnað því að taka málið til meðferðar.
Í dómi áfrýjunardómstólsins var þó opnað fyrir að Breivik gæti fengið heimsóknir frá öðrum föngum.
Lögmaður hans segir að heimsóknin í desember hafi verið stórt skref í rétta átt. Breivik vilji gjarnan eiga í samskiptum við fólk innan og utan fangelsisins.
„Óháð því hvað maður hefur gert hefur maður þörf fyrir að hitta annað fólk.“
Sagði lögmaðurinn.