Fyrir nokkrum dögum fundust móðir og tvær dætur hennar látnar í bíl móðurinnar í Dallas í Texas í Bandaríkjunum. Nú er komin niðurstaða í af hverju mæðgurnar létust og er hún vægast sagt skelfileg.

Daily Mail skýrir frá þessu.  Mæðgurnar sáust síðast á lífi á miðvikudag í síðustu viku þegar Natalie Chambers ók af stað um klukkan 8 til að fara með stúlkurnar til að hitta leikfélaga. En mæðgurnar skiluðu sér aldrei á áfangastað.

Á upptökum úr eftirlitsmyndavél sést hvar Natalie ók bifreið sinni inn á bifreiðastæði við Farmers Branch þar sem hún drap á vélinni. Upptökurnar sýna að hvorki Natalie né stúlkurnar fóru út úr bifreiðinni og enginn kom nálægt henni.

Sólarhring síðar fundust mæðgurnar látnar í bifreiðinni.

Bráðabirgðaniðurstöður rannsókna sýna að Natalie, sem var 31 árs, lést af völdum of stórs skammts af eiturlyfjum eða lyfjum en ekki liggur fyrir hvaða efni varð henni að bana. Dætur hennar, Isabel 4 ára og Elise 2 ára, létust af völdum þess hversu heitt varð í bílnum. Hitinn náði 33 gráðum í Dallas þennan dag og því var hitinn í Ford Escape bíl Natalie lífshættulegur.

Ættingi Natalie sagði að hún hafi barist við að reyna að losna undan oki fíkniefna og hafi einnig glímt við þunglyndi. Hún hafi sótt sér hjálp og hafi verið frábær móðir. Heimsfaraldur kórónuveirunnar hafi gert þunglyndið verra og að hún hafi greinilega fallið og byrjað aftur að nota fíkniefni eða lyf.