Bækur, skrifaðar af lýðræðissinnum í Hong Kong, eru nú farnar að hverfa af bókasöfnum borgarinnar. Ekki er lengur hægt að fá þær lánaðar og þær er ekki að finna í hillum safnanna. Svo ótrúlegt sem það er þá gerist þetta nokkrum dögum eftir að ný ströng öryggislög kínverskra stjórnvalda tóku gildi. Aðgerðasinnar í Hong Kong segja lögin ekkert annað en verkfæri kommúnistastjórnarinnar til að berja á andstæðingum stjórnvalda.

Nú er ekki lengur hægt að fá bækur eftur Joshua Wong lánaðar á bókasöfnum borgarinnar. Hann er einn af mest áberandi aðgerðasinnum borgarinnar. Sömu sögu er að segja af bókum Tanya Chan, sem er stjórnmálamaður og hefur verið framarlega í fylkingu þeirra sem berjast fyrir lýðræði.

Nýju öryggislögin tóku gildi í síðustu viku. Þetta er róttækasta lagabreytingin sem gerð hefur verið í Hong Kong siðan Bretar afhentu Kínverjum yfirráð yfir borginni árið 1997.

Joshua Wong er ekki í neinum vafa um að bækur hans hafi verið fjarlægðar af bókasöfnum vegna nýju laganna. Borgaryfirvöld segja að bækurnar hafi verið fjarlægðar á meðan rannsakað er hvort þær brjóti gegn nýju lögunum.

Lögin kveða á um að uppreisn eða tilraun til að knýja fram sjálfstæði Hong Kong geti varðað allt að lífstíðarfangelsi.