Fóstureyðing er morð á saklausu barni. Þetta segir Richard Bucci, sem er prestur í West Warwick í Rhode Island í Bandaríkjunum. Sterkir vindar hafa blásið um hann að undanförnu eftir að hann skrifaði lesendabréf í staðardagblað þar sem hann nafngreindi ýmsa stjórnmálamenn sem hann taldi óhæfa til að vera guðforeldra, vera viðstadda brúðkaup eða koma á nokkurn annan hátt að kirkjulegum athöfnum. Allt eru þetta stjórnmálamenn sem samþykktu ný fóstureyðingarlög ríkisins.

„Það er ekkert annað siðferðislegt málefni þar sem er hægt að bera barnaníð saman við fóstureyðingar. Barnaníð drepur engan en þetta gerir það.“

Sagði Bucci í samtali við NBC 10 þegar hann varði lesendabréf sitt. Hann bætti síðan við, án þess að styðja það nokkrum vísindalegum rökum, að fleiri börn hafi verið „drepin“ með fóstureyðingum en börn sem hafa verið beitt kynferðislegu ofbeldi.

Hann sagðist ekki telja að neinn þyrfti að undrast þessa skoðun hans þar sem kaþólska kirkjan hafi verið „verjandi lífs í rúmlega 2.000 ár“.

Ummæli hans vöktu mikla athygli og fengu mikla fjölmiðlaumfjöllun. Í kjölfarið neyddist hann til að draga aðeins í land en stóð samt fast við skoðun sína.

„Ég hefði átt að tala skýrar um að ég tel að barn sem er beitt kynferðislegri misnotkun eigi framtíð fyrir sér en fyrir ófætt barn, sem er eytt, er engin framtíð. Misnotaða barnið getur í það minnsta lifað og náð góðum árangri ef það fær viðeigandi meðferð og aðstoð.“