Talsmaður ísraelska hersins, Jonathan Conricus, segir að meðlimir hinna palenstínsku Hamassamtaka hafi hakkað sig inn í farsíma mörg þúsund hermanna. Notast var við falska notendareikninga, í nafni ungra og myndarlegra kvenna, á samfélagsmiðlum til að komast í samband við hermennina. Ef þeir svöruðu komst á samband og voru þeir hvattir til að taka þátt í skiptum á ljósmyndum sem áttu að sögn að eyðast eftir 30 sekúndur. Í tengslum við þessi myndaskipti voru þeir beðnir um að hlaða niður appi en það innihélt skaðlegan hugbúnað.
Conricus segir að þetta sé í að minnsta kosti þriðja sinn sem Hamasliðar hafa reynt að brjótast inn í farsíma hermanna með því að nota samfélagsmiðla. Hann segir að nýjasta tilraunin hafi verið miklu betur útfærð en þær síðustu og meira vandað til verks.
„Til að virka trúverðugri og til að útskýra hversu léleg hebreska málfræðin þeirra var, var hermönnunum sagt að konurnar væru innflytjendur af gyðingaættum.“
Sagði hann einnig.