Lögreglumenn í New York telja sig loksins vera búna að hafa hendur í hári manns sem grunaður er um stórtækan þjófnað á skartgripum af heimilum ríka fólksins í New York.
Maðurinn sem um ræðir heitir Samuel Sabatino og er 82 ára gamall.
Talið er að hann hafi stolið skartgripum og úrum að andvirði 400 þúsund Bandaríkjadala, ríflega 50 milljóna króna, á síðustu fimm árum.
Sabatino þessi var býsna útsmoginn, ef marka má umfjöllun New York Times um málið. Sjálfur var hann búsettur á Flórída en í sumarleyfum ók hann til New York þar sem hann gekk inn í byggingar þar sem finna má íbúðir margra ríkra einstaklinga.
Sabatino, sakleysislegur með stór gleraugu og í ósköp venjulegum fötum, gekk fram hjá öryggisvörðum sem spurðu einskis. Hann gekk svo milli íbúða og freistaði þess að komast inn í íbúðir þar sem augljóslega var enginn heima. Er hann sagður hafa notað gamalt bragð og athugað við hvaða íbúðir væri uppsafnaður póstur. Hann tók svo í hurðarhúna og fór inn í íbúðir sem stóðu ólæstar og mannlausar.
Sabatino náðist á eftirlitsmyndavélar í einu þessara húsa árið 2015 og síðan þá hefur lögregla reynt að hafa upp á honum. Það hefur loksins tekist.
Ákæran yfir Sabatino er í tólf liðum en lögregla hefur ekki útilokað að hann hafi verið viðriðinn fleiri innbrot í öðrum ríkjum, Arizona, Pennsylvaníu og Kaliforníu þar á meðal. Sabatino á fimmtán ára fangelsi yfir höfði sér verði hann fundinn sekur.