Árið 2013 fór starfsmaður (karlmaður) frönsku verkfræðistofunnar TSO í vinnuferð til Loiret, sem er sunnan við París. Þar hitti hann konu og fór heim með henni og stunduðu þau kynlíf. Hann fór síðan á hótelið sitt en lést af völdum hjartaáfalls skömmu eftir að hann kom þangað. Læknar tengdu andlátið við kynlífsiðkunina.

New York Times skýrir frá þessu. Fram kemur að tryggingafélag hafi komist að þeirri niðurstöðu að andlátið hafi verið vinnuslys og bæri vinnuveitandinn því ábyrgð á því. TSO hélt því hins vegar fram að andlátið hefði borið að eftir að hefðbundnum vinnudegi lauk og því bæri fyrirtækið ekki neina ábyrgð á því.

Málið fór því fyrir dóm og í maí kom það fyrir áfrýjunardómstól í París sem úrskurðaði tryggingafélaginu í vil. Það var þó fyrst í síðustu viku sem skýrt var opinberlega frá málinu. Í dómsniðurstöðunni segir að lög, sem tryggja franska launþega á vinnustöðum þeirra, gildi einnig allan þann tíma sem þeir eru í vinnuferðum. Gildi þar engu að kynlíf mannsins með konunni hafi tæplega tengst vinnu hans.