Yfirvöld í Odsherred, sveitarfélagi í Sjálandshéraði í Danmörku, hafa ákveðið að gefa starfsmönnum sínum, alls 300 manns, frí alla föstudaga. Þetta er liður í áhugaverðri tilraun um styttingu vinnuvikunnar og mun tilraunin standa yfir næstu þrjú ár.
Þetta kemur fram í frétt BT í Danmörku.
Í stað 40 stunda hefðbundinnar vinnuviku verður vinnuvikan 35 stundir – einstaka dagar verða því örlítið lengri en áður. Þeir sem taka þátt í tilrauninni halda eftir sem áður fullum launum. Þá munu starfsmenn fá tvær klukkustundir í viku sem þeir geta nýtt að vild. Einu skilyrðin eru að tímanum verði varið í eitthvað sem tengist starfinu, til dæmis með endurmenntun eða námskeiðum.
Yfirvöld í Odsherred segja að með breytingunni muni þjónusta sveitarfélagsins ekki skerðast að neinu leyti. Mikið hefur verið rætt um styttingu vinnuvikunnar og hafa tilraunir verið gerðar víða með góðum árangri.