Nokkur Evrópuríki hafa sótt nokkur börn í flóttamannabúðir í Írak og Sýrlandi og flutt heim en mörg dvelja þar enn og ekki er vitað hvað á að gera í málum þeirra. Flestar ríkisstjórnir halda að sér höndum og reyna að gera sem minnst í málinu. Það á einmitt við um dönsk stjórnvöld sem eru í ákveðinni klemmu vegna barna danskra ríkisborgara, sem börðust með Íslamska ríkinu, sem dvelja í flóttamannabúðum í Írak og Sýrlandi. 13 ára drengur var þó í júní fluttur úr flóttamannabúðum í Sýrlandi til Danmerkur en hann var illa særður.
Danski þjóðarflokkurinn vill ekki að svo gömul börn séu sótt og flutt til Danmerkur en telur að vel sé hægt að sækja ung börn og flytja heim þar sem þau verði „enduruppalin“. Søren Espersen, talsmaður flokksins í utanríkismálum, segir að 13 ára drengur verði varla kallaður barn, hann hafi upplifað stríð og væntanlega tekið þátt sem liðsmaður Íslamska ríkisins.
„Þau hafa sjálf komið sér í þessar aðstæður og við setjum öryggi Danmerkur ofar persónulegum vandamálum þeirra.“
Sagði hann um þá dönsku ríkisborgara sem eru í flóttamannabúðum í Írak og Sýrlandi. Þjóðarflokkurinn telur þó að vel sé hægt að sækja ung börn í flóttamannabúðirnar.
„Já, þá verður að taka barnið af foreldrunum, sem fá aldrei að stíga fæti í Danmörku. Síðan á að koma barninu fyrir í fóstri hjá góðum og ástríkum, helst kristnum fjölskyldum sem geta komið þeim í takt við veruleikann á nýjan leik.“
Sagði Espersen einnig í samtali við Jótlandspóstinn.