Borgarstjórnin í Dresden í Þýskalandi hefur lýst yfir neyðarástandi og að tekið verði upp sérstakt „viðbragðsstig“ vegna mikilla vandræða tengdum nýnasistum og öfgahægrimönnum í borginni. Dresden, sem er höfuðborg Sachsen, hefur lengi verið brjóstvörn öfgahægrimanna. Þar varð Pegida-hreyfingin til en hún er andsnúin múslimum.
Borgaryfirvöld sækjast eftir að borgin verði Menningarhöfuðborg Evrópu 2025. Þau segja í yfirlýsingu sinni að það verði að gera meira í baráttunni við öfgahægrimenn. Max Aschenbach, sem lagði tillöguna fram í borgarstjórn, segir að yfirlýsingin þýði að borgaryfirvöld staðfesti að þau standi frammi fyrir alvarlegu vandamáli, opnu lýðræðislegu samfélagi sé ógnað.
Samkvæmt yfirlýsingunni á að styrkja lýðræðislega hversdagsmenningu með því að veita minnihlutahópum og fórnarlömbum ofbeldis betri vernd.
Horst Seehofer, innanríkisráðherra Sambandslýðveldisins, segir að lögreglan leggi hald á sífellt meira af vopnum hjá hópum öfgahægrimanna.