Að minnsta kosti níu bandarískir ríkisborgarar, þrjár mæður og sex börn þeirra, voru myrt af mexíkóskum glæpasamtökum að talið er. Um var að ræða hóp bandarískra mormóna sem búsettur var í Sonora-héraði í Mexíkó, en héraðið liggur að ríkismörkum Arizona.
Fólkið var á leið í brúðkaup í gær en alls voru sautján manns á ferð í þremur bílum þegar skotárás var gerð á bílana. Sem fyrr segir létust að minnsta kosti níu manns og þá er talið að einhverra sé enn saknað.
Rhonita Maria LeBaron lést ásamt tvíburabörnum sínum sem voru sex mánaða. Tvö börn hennar til viðbótar létust einnig í árásinni, tíu og tólf ára. Mikill eldur kom upp í bifreið þeirra þegar byssukúlunum rigndi yfir hana. Staðfest hefur verið að Christina Longford Johnson, 31 árs, Dawna Ray Longford, 43 ára og tvö börn Dawnu, Trevoer og Rogan, 11 og 3 ára, hafi einnig látist.
Ekki liggur fyrir hvers vegna ráðist var á þessa tilteknu fjölskyldu eða hverjir voru að verki. Þó eru líkur taldar á því að árásin hafi átt að beinast að einhverjum öðrum.
Atvikið átti sér stað nærri bænum Bavispe en svæðið er alræmt vegna fíkniefnagengja sem berjast hatrammlega um yfirráð.