Inyoung You og Alexander Urtula voru par og stunduðu bæði nám í háskóla í Boston í Bandaríkjunum.  Á þeim 18 mánuðum sem samband þeirra varði beitti You unnusta sinn miklum þrýstingi til að fyrirfara sér. Hann glímdi við þunglyndi. Hann var aðeins 22 ára þegar hann tók líf sitt en You er 21 árs. Hún hefur nú verið ákærð fyrir að hafa valdið dauða hans.

CNN skýrir frá þessu. Fram kemur að You hafi margoft sagt honum að heimurinn og fjölskylda hans væru betur komin án hans. Hún er einnig sögð hafa einangrað hann frá vinum og ættingjum og fylgst með ferðum hans í gegnum staðsetningarbúnað farsíma.

Síðustu tvo mánuðina fyrir andlát Urtula sendi You honum 47.000 smáskilaboð þar sem hún skipaði honum og þrýsti á hann að taka eigið líf. Þetta segir saksóknari í Suffolk sýslu þar sem málið verður tekið fyrir.

You er einnig sögð hafa verið til staðar þegar Urtula batt endi á líf sitt í Roxbury í Boston í maí á þessu ári. Það gerði hann aðeins 90 mínútum áður en hann átti að þreyta lokapróf sitt í háskólanum.

Saksóknari segir að með aðgerðum sínum hafi You „skapað lífshættulegar aðstæður“ fyrir Urtula. Hún hafi vitað hann glímdi við þunglyndi og sjálfsvígshugsanir sem hún hafði komið inn hjá honum. Þrátt fyrir þetta hafi hún haldið áfram að hvetja hann til að taka eigið líf.