Ábendingar hafa borist um að þeir, sem eru á listanum, hafi hugsanlega átt hlut að máli. Lögreglan rannsakaði málið sem mannrán í tíu vikur en skipti síðan yfir í annan farveg og hóf morðrannsókn sem stendur enn. Ekkert lífsmark hefur borist frá Anne-Elisabeth síðan hún hvarf. Fjölskylda hennar heldur í vonina um að hún sé á lífi en lögreglan telur nær útilokað að svo sé.
TV2 segir að margir hafi verið yfirheyrðir vegna málsins. Allir hafa þeir haft stöðu vitna í málinu en margir þeirra hafa einnig verið beðnir um að gera grein fyrir ferðum sínum þann 31. október á síðasta ári þegar Anne-Elisabeth hvarf. Samkvæmt heimildum TV2 hefur rannsókn lögreglunnar beinst að ákveðnum brotamönnum og glæpasamtökum til að afla frekari upplýsinga um málið. Við yfirheyrslur og í ábendingum hafa ákveðin nöfn komið upp á fólki sem gæti tengst málinu og er lögreglan að rannsaka hvort þessir aðilar tengist málinu.
Tommy Brøske, sem stýrir rannsókninni, vildi ekki tjá sig um þetta við TV2 en staðfesti að lögreglan sé nú að skoða hugsanlegan þátt nafngreinda aðila í málinu. Hann sagði lögregluna telja að undirbúningur að hvarfi Anne-Elisabeth hafi staðið yfir í marga mánuði áður en látið var til skara skríða. Lögreglan hefur staðfest við VG að blóð hafi fundist á heimili Hagen-hjónanna eftir hvarf Anne-Elisabeth.