Brad Gobright, einn færasti klettaklifrari Bandaríkjanna og þótt víðar væri leitað, lést af slysförum í vikunni. Brad var 31 árs gamall og varð slysið á hinu vinsæla El Potrero Chico-svæði í Mexíkó.

Í frétt BBC kemur fram að Brad hafi verið á niðurleið ásamt félaga sínum, Aidan Jacobson, þegar lína sem þeir voru í gaf sig. Ekki liggur ljóst fyrir hvernig slysið bar að en afleiðingarnar urðu þær að Brad skall til jarðar. Var fallið um 300 metrar að talið er. Aidan komst lífs af úr slysinu en hann lenti í runna á klettasyllu fyrir undan.

Brad var einkar lunkinn klifrari og stundaði hann iðju sína oftar en ekki án reipis og annars öryggisbúnaðar. Hann setti hraðamet á nokkrum leiðum, til dæmis The Nose, þekktum vegg í Yosemite-dalnum í Kaliforníu.

Alex Honnold, klettaklifrari sem fylgst var með í Óskarsverðlaunamyndinni Free Solo, minnist félaga síns með fallegum orðum. „Einstök og falleg sál og einn fárra sem ég naut þess virkilega að eyða dögunum með.“