Á sunnudaginn var fyrsta ferðin farin í tilraunaskyni. Í henni voru 50 farþegar, tilraunafarþegar, auk áhafnar. Í þessari fyrstu ferð hófst rannsókn á áhrifum svo langrar flugferðar á fólk.
Bloomberg skýrir frá þessu. Fram kemur að náið hafi verið fylgst með og verði fylgst með farþegunum og áhöfninni. Farþegarnir urðu að fylgja mjög skipulagðri dagskrá á leiðinni. Þeir urðu að borða, sofa og drekka á ákveðnum tímum. Þeir eiga einnig að halda nokkurskonar dagbók næstu vikurnar. Markmiðið með þessu er að rannsaka hvernig er hægt að draga úr flugþreytu.
Flugmennirnir voru tengdir við heilarita á leiðinni og þurftu að skila þvagsýnum en mæla á magn svefnhormóns í þeim.
Qantas er ekki fyrsta flugfélagið til að bjóða upp á mjög langt beint flug og er sjálft með fleiri mjög löng flug í boði. Til dæmis er flogið beint á milli Perth í Ástralíu og Lundúna í Englandi. Qatar Airways flýgur beint frá Auckland á Nýja-Sjálandi til Doha í Katar en það flug tekur tæplega 18 klukkustundir. Singapore Airlines flýgur beint á milli Singapore og New York en það flug tekur rúmlega 18 klukkustundir.