Mynd sem sýnir fimm ára dreng borða kvöldmatinn sinn af pappaspjaldi úti á götu hefur vakið mikla athygli. Um er að ræða fimm ára dreng en myndin var tekin í Dublin á Írlandi.
Það voru samtökin The Homeless Street Cafe sem birtu myndina, en samtökin aðstoða heimilislausa í borginni. Einu sinni í viku ganga fulltrúar kaffihússins um götur miðborgarinnar og bjóða bágstöddum mat, hreinlætisvörur og hlýjan fatnað.
Umræddur fimm ára drengur var í hópi þeirra sem hópurinn hitti í vikunni en á Facebook-síðu samtakanna kom fram að þau teldu sig knúin til að birta myndina til að varpa ljósi á stöðu þeirra sem búa á götunni.
Myndinni hefur verið deilt mörg þúsund sinnum og fjölmargir hafa tjáð sig undir henni, meðal annars foreldrar sem eiga börn á svipuðum aldri og pilturinn á umræddri mynd.
Samtökin sögðu að pilturinn væri á hrakhólum ásamt móður sinni, en þau hefðu þó sem betur fer fengið tímabundið gistirými þar sem þó er engin eldunaraðstaða.
Samkvæmt tölum sem írskir fjölmiðlar vitna til voru um tólf þúsund einstaklingar, þar af 3.800 börn, heimilislausi í Írlandi í ágústmánuði.