Þingkonan Kamala Harris var harðorð í kappræðum forsetaframbjóðenda í Bandaríkjunum í gær þegar kom að umræðu um heilbrigðismál.
„Þetta eru sjöttu kappræðurnar sem við höfum mætt í og varla hefur verið minnst einu orði á aðgengi kvenna að frjósemisvernd, sem er verið að ráðast á af fullum krafti í Bandaríkjunum í dag, þó við ræðum sí og æ um heilbrigðiskerfið.“
Kamala notaði aldrei orðið þungunarrof en var að vísa til löggjafar gegn þungunarrofi sem tekið hefur gildi í nokkrum ríkjum í Bandaríkjunum síðasta hálfa árið. Ríki eins og Alabama, Georgía, Ohio og Missouri hafa öll bannað þungunarrof snemma á meðgöngu.
Kamala segir það hneisu að frjósemisvernd kvenna hafi ekki borið á góma í kappræðunum.
„Það eru ekki ýkjur að segja að konur muni deyja – fátækar konur, litaðar konur deyja – vegna þessarar löggjafar Repúblíkana í þessum ríkjum, sem er algjörlega úr tengslum við Bandaríkjamenn og segja konum hvað þær eiga að gera við líkama sinn,“ sagði Kamala.
„Fólk þarf að hætta að skipta sér af líkömum kvenna og leyfa konum að taka sínar eigin ákvarðanir. Tölum um þetta. Þetta er mikilvægt heilbrigðismál í Bandaríkjunum í dag.“
Stuttu síðar lýsti þingmaðurinn Cory Booker yfir stuðningi við málflutning Kamölu og kallaði stríðið gegn rétti til þungunarrofs „skýra og raunverulega ógn í Bandaríkjunum.“
„Við sjáum að réttindum kvenna til að fjölga sér er ógnað út um allt land og Guð blessi Kamölu, en vitið þið hvað? Konur ættu ekki að vera þær einu sem vekja máls á þessu og berjast,“ sagði hann. „Og karlmenn, þetta er ekki bara út af því að konur eru dætur okkar og vinir okkar og eiginkonur okkar. Þetta snýst um það að konur eru fólk og fólk á rétt á að stjórna eigin líkama.“
Hér fyrir neðan má sjá brot úr tölu Kamölu:
Kamala Harris: „It’s not an exaggeration to say women will die — poor women, women of color will die — because these Republican legislatures in these various states who are out of touch with America are telling women what to do with their bodies“ #DemDebate pic.twitter.com/rtyjHfQnBT
— CNN Politics (@CNNPolitics) October 16, 2019