Vörusýningin, North Carolina Mountain State Fair, fór fram í bænum Fletcher dagana 6. til 15. september síðastliðinn. Eftir vörusýninguna fór að bera á alvarlegri lungnapest meðal þeirra sem heimsóttu sýninguna. Rannsókn leiddi í ljós að um hermannaveiki var að ræða og telja sérfræðingar nú að sýkingin eigi rætur að rekja til heitu pottanna sem voru til sýnis.
Heimkynni bakteríunnar er í vatni og er kjörhitastig hennar 30 til 40 gráður. Hún er býsna hörð af sér og getur lifað í hærri og lægri hita árum saman og sest oftar en ekki í pípulögnum þar sem hún fær ágætan frið. Bakterían getur verið hættuleg, sérstaklega hjá þeim sem eru með undirliggjandi áhættuþætti, en þó geta fullfrískir einstaklingar fengið bakteríuna án þess að veikjast.
Í frétt CNN sem fjallar um málið kemur fram að ítarleg rannsókn hafi leitt í ljós að þeir sem veiktust áttu það sameiginlegt að hafa komið í námunda við heitu pottana á vörusýningunni. Þá leiddu sýnatökur í ljós að bakterían var í umræddum pottum. 88 einstaklingar frá nokkrum ríkjum Bandaríkjanna hafa verið lagðir inn á spítala en alls hafa 134 tilfelli hermannaveiki greinst. Tveir eru látnir af völdum sýkingarinnar.
Aðstandendur þeirra sem létust og veiktust hafa kallað eftir því að einhver verði látinn sæta ábyrgð vegna málsins. Um hafi verið að ræða stórkostlegt gáleysi sem endurspeglast í fjölda tilfella. „Allir sem framleiða heita potta og selja þá eiga að vita að heimkynni bakteríunnar eru í vatni,“ segir Matt Wetherington, lögfræðingur fjölskyldnanna sem hyggjast sækja rétt sinn í málinu.
Heilbrigðisyfirvöld hafa hvatt þá sem fóru á sýninguna og veiktust í kjölfarið að hafa samband við lækni. Mögulegt sé að fleiri séu veikir, haldandi að þeir séu með slæma flensu, án þess að gera sér grein fyrir því að um hermannaveiki sé að ræða.
