Hollenska ríkisstjórnin og mörg hollensk samtök og stofnanir vilja að hætt verði að kalla landið Holland og að í staðinn verði notast við heitið Niðurland. Ástæðan er að talið er að orðið Niðurland bæti ímynd landsins á erlendum vettvangi.
Hollenska blaðið De Volkskrant skýrir frá þessu. Holland er notað sem heiti á landið á mörgum tungumálum, til dæmis íslensku. En sumstaðar er talað um the Netherlands/Niðurland og það þurfum við kannski að fara að temja okkur.
Nafnið Holland vísar til tveggja af tólf héruðum landsins, Noord-Holland og Zuid-Holland.
Fram kemur að það að fólk segist vera frá Hollandi gefi til kynna klisjufyllta mynd af túlipönum, vindmylum, osti og hassi að mati hollenska utanríkisráðuneytisins. Þetta vilja Hollendingar binda endi á og því á aðeins að vísa til Niðurlands í framtíðinni.
Ráðuneytið telur að nafnið Holland sé ekki sérstaklega hentugt þegar reynt er að fá ferðamenn til að heimsækja aðra staði en Amsterdam. Orðið Holland varð fyrir valinu í opinberri markaðssetningu á sínum tíma vegna þess að það þykir þjálla á tungu en að segja Niðurland.
Samtök ferðaþjónustunnar þar í landi virðast vera sammála því að leggja eigi áherslu á hina niðurlensku ímynd en ekki hollensku til að efla ferðamannaiðnaðinn.
Söngvakeppni evrópskra sjónvarpsstöðva fer fram í Hollandi/Niðurlandi á næsta ári og á að reyna að nota keppnina til að koma „nýja“ nafninu á kortið.