Bloomberg er áttundi ríkasti maður Bandaríkanna og ellefti ríkasti maður heims en auður hans er metinn á um 44 milljarða dollara. Það er því enginn fátæklingur sem er að íhuga framboð gegn Trump. Trump sjálfur á 3,1 milljarða dollara og ekki á topp 500 yfir ríkustu menn heims.
Í gær tilkynnti Bloomberg að hann ætli að gefa Johns Hopkins háskólanum 1,8 milljarða dollara. Þetta er stærsta einstaka gjöf sem menntastofnun í Bandaríkjunum hefur nokkru sinni fengið. Peningana á að nota til að aðstoða nemendur sem koma úr láglauna- og millistéttarfjölskyldum sem eiga oft erfitt með að greiða himinhá skólagjöld.
Gjöfin styrkir þá ímynd Bloomberg að hann sé mikill mannvinur en samkvæmt umfjöllun Washington Post hefur hann áður gefið 6,4 milljarða dollara til góðgerðarmála.
Í grein í New York Times skýrir Bloomberg af hverju hann gefur háskólanum alla þessa peninga. Hann segir að hann hafi sjálfur getað stundað nám við skólann með því að taka námslán og með því að vera í hlutastarfi meðfram námi. Þetta hafi opnað dyr sem annars hefðu verið honum lokaðar. Þetta hafi gert honum kleift að upplifa ameríska drauminn.
„Ég vil tryggja að skólinn, sem gaf mér tækifæri, geti opnað þessar sömu dyr varanlega fyrir alla. Að neita fólki um réttinn til að læra vegna getu þeirra til að greiða skólagjöld grefur undan jöfnum tækifærum fyrir alla. Þetta viðheldur fátækt á milli kynslóða.“
Segir Bloomberg í grein sinni.
Bloomberg lagði 110 milljónir dollara í kosningasjóði demókrata fyrir kosningarnar í byrjun mánaðarins. Ef hann tekur ákvörðun um að bjóða sig fram er ljóst að hann hefur úr nægu fjármagni að spila og pólitísk reynsla hans er mikil eftir að hafa verið borgarstjóri í heimsborginni New York. Hann er sagður vera raunsær stjórnmálamaður sem hafi áhuga á samfélagslegum framförum.
