Björgunaraðgerðir hófust fyrir um tveimur klukkustundum í Taílandi en þá fóru kafarar inn í hellinn. Þar sitja fimm og bíða björgunar. Ekki er vitað hvort hægt verði að bjarga þeim öllum út í dag eða hvort það verði fjórir sem koma út í dag eins og í gær og fyrradag en reynt verður að koma öllum fimm út í dag. Því hefur verið velt upp að ef aðeins fjórir verði fluttir út í dag þá muni þjálfari strákanna bíða þar til á morgun.

Ríkisstjórinn í Chiang Rai segir að strákarnir átta, sem hefur nú þegar verið bjargað út, séu við góða heilsu en þeir dvelja nú á sjúkrahúsi og verða þar í minnst eina viku. Þeir eru sagðir hafa verið svangir en ágætlega á sig komnir andlega. Tveir eru sagðir vera með lungnabólgu.

Á fréttamannafundi í nótt sögðu stjórnendur aðgerðanna að þeir fimm sem bíða björgunar verði allir fluttir út úr hellinum í dag. 19 kafarar héldu inn í hellinn. Mikið hefur rignt í nótt á svæðinu en ástandið í hellakerfinu er samt sem áður talið ágætt. Aðgerðir hófust fyrr í dag en undanfarna tvo daga og er talið líklegt að mikil rigning eigi þar hlut að máli, að ekki sé hættandi á að bíða ef vatnsmagnið í hellakerfinu skyldi aukast.

https://www.youtube.com/watch?v=aIsh7TcjGFk