Það er rosalega sniðugt að fá sér hristing stöku sinnum, sem gengur undir ýmsum nöfnum, þar á meðal boost og smoothie. Hins vegar er mikilvægt að halda góðu jafnvægi í drykknum því of mikið af ávöxtum getur dúndrað blóðsykrinum upp og látið hungrið kalla stuttu síðar.

Í grein á Huffington Post er talað við næringarfræðinga sem benda á að sumir hristingar geti innihaldið nánast jafnmikið af sykri og kókdós. Það er ýmislegt hægt að gera til að halda ávaxtamagninu í lagi. Næringarfræðingurinn Rebecca Ditkoff mælir með að sleppa ávaxtasafa í þeytingnum og skipta honum út fyrir vatn. Þá mælir hún einnig með að setja ekki meira en einn bolla af ávöxtum í hvern drykk.

Annar næringarfræðingur, Meredith Price, segir það mikil mistök að nota of mikið af ávöxtum en ekki nóg af grænmeti í drykki. Þá segir hún einnig mjög vont að nota drykki til að blanda með sem innihaldi mikið af viðbættum sykri, svo sem sæt mjólk eða ávaxtasafa.

Enn annar næringarfræðingur, Jess Swift, segir ávexti eins og mangó og ananas innihalda mikinn ávaxtasykur og ætti því að nota þá í hófi. Þá bendir hún á að jógúrt innihaldi oft ótrúlega mikið af sykri og ætti fólk að vara sig á því.

Í stuttu máli er mælt með að í einn þeyting fari að hámarki einn bolli af ávöxtum og mikið af grænmeti. Þá er tilvalið að blanda þeytinginn með vatni eða mjólk eða safa sem inniheldur lítið af viðbættum sykri og ávaxtasykri. Þá er ekki mælt með því að nota meira en tvær matskeiðar af hnetusmjöri í drykkinn og ekki meira en tvær matskeiðar af fræjum. Þá er ekki gott að nota meira en fjórðung af avókadó í hvern drykk. Á vef Huffington Post er síðan hægt að finna hugmyndir af þeytingum sem næringarfræðingar samþykkja.