Helga Sævarsdóttir, svæðisstjóri og fagstjóri hjúkrunar í Árbæ, mætti til þeirra Gulla og Heimis í Bítið á Bylgjunni í morgunsárið og varaði fólk við að borða yfir sig yfir jólahátíðina. Eins og heyra má í viðtalinu segir Helga að mikilvægt sé að borða hægt.

„Það er svolítið stórt atriði. Þó þetta virðist eitthvað svona mjög einfalt þá virkilega hefur það áhrif á hve fljótt við verðum södd,“ segir Helga og kynnti hlustendur fyrir tækni til að borða hægar.

„Eitt mjög einfalt og þægilegt ráð er að taka hnífapörin, leggja þau aðeins til hliðar, taka djúpt andann og spjalla aðeins við þá sem maður er að borða með,“ segir Helga. „Ekki vera alveg á fullu.“

Helga segir einnig lykilatriði að drekka nóg af vatni og varar fólk með undirliggjandi sjúkdóma að borða mjög saltan mat.

„Kannski smakka. Við njótum ekkert betur jólanna þó við séum svo södd að okkur líði illa þegar líður á kvöldið,“ segir hún og ítrekar að fólk verði að huga að heilsunni líka í desember.

„Við á Heilsugæslunni viljum minna á þetta, að huga að heilsunni í desember, ekki bara í janúar. Þá komum við betur í stakk búin inn í janúar. Við vitum það alveg að þessi átök, að taka átak í janúar, það reddar ekkert málunum.“

Hlusta má á viðtalið við Helgu í heild sinni hér fyrir neðan: