Stysta stríð milli tveggja landa sem vitað er um var háð á milli breska heimsveldisins og eyjunnar Zanzibar þann 27. ágúst árið 1896. Zanzibar tilheyrir í dag Tanzaníu á austurströnd Afríku. Þegar soldán eyjunnar, Hamad bin Thuwaini, lést tók frændi hans Khalid bin Barghash við en Bretar vildu koma sínum manni Hamud bin Muhammed í hásætið. Sendu þeir fimm orrustuskip og þúsund manna lið til eyjunnar og hófu skothríð á höll soldáns. Sumir segja að orrustan hafi varað í 38 mínútur, aðrir 40 en lengstu áætlanir gera ráð fyrir 45 mínútum. Mannfallið var gríðarlegt hjá heimamönnum, um 500 manns sem er meira en 10 dauðsföll á mínútu. Þá flúði soldán í þýska sendiráðið, fékk þar hæli og var stríðinu þá lokið með fullnaðarsigri Breta.