Willum Þór Þórssyni, forseta ÍSÍ og fyrrverandi ráðherra, líkar vel skeleggur málflutningur Lilju Alfreðsdóttur, nýkjörins formanns Framsóknar, sem leggur áherslu á verðmætasköpun. Hann telur bókun 35 vera lagatæknilegt atriði og telur Lilju ekki ganga gegn vilja flokksmanna með þeirri stefnubreytingu sem hún boðar í afstöðunni til bókunar 35. Hann saknar stjórnmálanna en telur það sanngirnismál að forseti ÍSÍ missi sig ekki í pólitík. Willum er gestur Ólafs Arnarsonar í hlaðvarpi Eyjunnar.
Willum Þór - 5
Það vakti athygli að þú varst snöggur til og lýstir yfir stuðningi við Lilju Alfreðsdóttur þegar hún lýsti yfir sínu framboði. Nú er hún í sömu stöðu og þú, hún er formaður Framsóknar utan þings. Eykur það ekki brekkuna að formaðurinn skuli vera utan þings?
„Það getur alveg verið snúið svona talandi um þetta að skapa skriðþunga, en það er ekkert, það er auðvitað ekki útilokað. Hún þurfti auðvitað bara að kljást við þessa ákvörðun, í þessari ákvörðun sinni, ekki bundin af neinu öðru. engum skyldum sem hún hafði tekist á herðar, aðrar. Þannig að ég skil hana að mörgu leyti. Þar sem að ég, af því að ég reyndi að orða þetta nú pent, það er nú svona kannski ekki alveg venjan að maður sé svona afgerandi í stuðningi. En ég reyndi að orða þetta þannig að hvetja hana til að fara fram af því mér fannst skipta mjög miklu máli að það yrði keppni. Sigurður Ingi búinn að vera í áratug og ég get alveg sagt það, ég hef alltaf stutt hann og þennan tíma hefur Lilja verið varaformaður, og stutt hana þá og þá fannst mér alveg eðlilegt að vera samkvæmur sjálfum mér í að styðja hana áfram í þetta, ekkert sagt gegn hinum frambjóðendunum um annað en það, mér fannst mjög mikilvægt að það yrði keppni. og við fengjum þá meiri athygli og umræðu og reyndum að í gegnum það að kjarna okkur svolítið vegna þess að ég held að það blasi við, ég hef heyrt það frá mörgum, að við höfum svolítið tapað erindinu.
Það eru margir sem spyrja mig, Willum minn, hvað eruð þið, hvað gerið þið? Fyrir hverju standið þið?“
Lilja gaf mjög ákveðnar yfirlýsingar, bæði í kosningabaráttunni um formannsstólinn og líka eftir að hún varð formaður. Það má segja að hún hafi breytt stefnu Framsóknarflokksins. Framsóknarflokkurinn var í ríkisstjórn sem vildi samþykkja bókum 35. Nú er Framsóknarflokkurinn, Framsóknarflokkur Lilju, nú er hann á móti bókum 35. Manni sýnist vera að myndast svona tvær fylkingar í íslenskum stjórnmálum, að það sé svona íhaldssamari fylking, sem er þá Framsókn, Miðflokkur og Sjálfstæðisflokkur. Svo er það frjálslyndari fylkingin, þar sem er Samfylkingin og Viðreisn. Og kannski má setja Flokk fólksins þarna á milli.
„Þetta er mjög athyglisverð greining og ég held að hún sé nú ekki fjarri lagi. Ég sé það að formaðurinn okkar, Lilja, tekur svona prinsippafstöðu í utanríkismálum og fullveldistengdum málum sem þessi sannarlega eru. Ég hef alveg skilning á því. Það má alveg útleggja þetta í svona útskýringum á einhverja vegu, bókun 35 til að mynda hefur á sér svona lagatæknilega útskýringu. Þannig að ef þú talar við lögfróða aðila í stjórnskipan, þá segja þeir: Þetta er bara staðan á því hvernig við virðum lögin og aðkomu okkar í gegnum EES-samninginn og hvaða forgangsröðun lög hafa. Hvort þú setur þetta inn, það er svona meiri prinsippafstaða sem formaðurinn tekur og sú skoðun er alveg innan Framsóknarflokksins og Framsóknarflokkurinn er svona breiður miðjuflokkur, frjálslyndur félagshyggjuflokkur. Ég er alveg skýr í minni afstöðu og ég fagna því hvernig formaðurinn líka bara fer af stað með það að horfa til áherslu á verðmætasköpun og vísar í svona gamalt slagorð, vinna, vöxtur, velferð, sem grundvalli þá það að geta byggt hér upp þetta norræna velferðarkerfi sem að við höfum lagt áherslu á og verðmætasköpunin grundvallar. Formaðurinn fer mikið inn á núna hvernig staðan er í efnahagsmálum. Við erum auðvitað þar að kljást við svolítið vandræðastöðu þar sem að við náum ekki verðbólgunni niður og búum við hærri vexti, við ætluðum að vera komin lengra. Á sama tíma og það er hér að skapast, það er að aukast atvinnuleysi. Og þetta er auðvitað atriði sem við verðum að horfa til.
Við höfum sem þjóð í gegnum tíðina verðlagt okkur eða svona vanið okkur á í hagkerfinu að verðleggja okkur í gegnum hagsveiflur til að halda uppi atvinnustigi. Það er auðvitað mjög mikilvægt. Það hefur einkennt okkar þjóð að hafa vinnu og skapa atvinnu og þegar þú hefur vinnu þá geturðu alltaf bjargað þér. Og þetta viðhorf af svona eldri kynslóðum, það er dýrmætt að halda í það. Þessi verðmætasköpun og áhersla á á fjölbreytta atvinnuuppbyggingu grundvallar auðvitað möguleika okkar á að byggja upp velferðarkerfið. Þetta er tónn sem mér líkar ágætlega og er Framsókn, þetta er erindið. Nú ertu kominn með mig á kaf í pólitík sem ég ég er að reyna að standa svolítið utan við. Mér finnst það bara svona sanngirni, verandi í minni stöðu sem forseti ÍSÍ, að missa mig ekki í pólitík, en ég sakna hennar og ég fer ekkert leynt með það hvar ég stend í pólitík.“
