Ungmennaþing KSÍ verður haldið í höfuðstöðvum KSÍ sunnudaginn 15. mars kl. 10:00-16:00.
Þingið er fyrir ungmenni á aldrinum 13-23 ára og má hvert félag senda sex fulltrúa á þingið. Ungmennaráð KSÍ hvetur félög til að huga að kynjajafnvægi þegar fulltrúar eru valdir á þingið.
Með ungmennaþingi vill KSÍ heyra raddir ungra iðkenda sem er stærstur hluti knattspyrnuiðkenda á Íslandi. Þátttakendur á ungmennaþinginu hafa möguleika á að sækjast eftir setu í ungmennaráði í kjölfar þingsins.
Tvö aðalumræðuefni verða tekin fyrir í ár. Ragnhildur Skúladóttir frá ÍSÍ mun halda stuttan fyrirlestur um íþróttir sem forvarnir og í kjölfarið verður farið í umræður í litlum hópum um fótbolta sem forvarnir.
Atli Guðnason mun halda erindi um verkefni sem er í gangi hjá FH sem kallast framhaldsbolti. Þar er strákum á framhaldsskólaaldri boðið að mæta og spila fótbolta sér að kostnaðarlausu. Í framhaldi af því verða umræður í minni hópum um aðgengi að fótbolta fyrir ungt fólk. Þar verður meðal annars skoðað:
-
Hvað getur KSÍ gert til að auka aðgengi ungmenna að fótbolta?
-
Hvað geta félögin gert?
-
Hvað geta sveitarfélögin gert?
-
Hvað geta skólarnir gert?
Von er á góðum gestum og verður mikil áhersla lögð á að allir skemmti sér vel og komi reynslunni ríkari út af þinginu.
| Dagskrá |
|
| 09:30 – 10:00 |
Mæting |
| 10:00 – 10:15 |
Setning þings – Björn Skúlason, eiginmaður forseta Íslands, setur þingið. |
| 10:15 – 10:45 |
Hópefli |
| 10:45 – 11:40 |
Erindi 1 + Umræður – Ragnhildur Skúladóttir sviðsstjóri fræðslu- og almenningsíþróttasviðs ÍSÍ heldur erindi um íþróttir sem forvörn |
| 11:40 – 12:10 |
Pizza og spurningakeppni í umsjón Stefáns Pálssonar sagnfræðings |
| 12:10 – 12:45 |
Heimsókn – Davíð Snorri og Ólafur Kristjáns – Aðstoðarþjálfarar A landsliða karla og kvenna mæta og svara spurningum þinggesta |
| 12:45 – 13:40 |
Erindi 2 + umræður – Atli Guðnason kynnir verkefnið Framhaldsbolti sem er í gangi hjá FH. |
| 13:40 – 14:30 |
Skoðunarferð um KSÍ + Hópmynd |
| 14:30 – 15:15 |
Fræðsluerindi – Vanda Sigurgeirsdóttir fyrrverandi formaður KSÍ og eigandi KVAN heldur fræðsluerindi um leiðtogahæfni. |
| 15:15 – 16:00 |
Samantekt, erindi frá Ungmennaráði og lokaorð |
