Gylfi Ólafsson, formaður bæjarráðs Ísafjarðarbæjar og oddviti Í-listans, blæs á kjaftasögur um að bæjarpólitíkin sé eingöngu stökkpallur fyrir hann inn í landsmálin. Gylfi, sem er í Viðreisn, segist horfa til langrar framtíðar að klára stór mál á Ísafirði.

„Það er gömul og góð hefð að „blása á kjaftasögur“ sem fáir hafa heyrt, gjarnan með þeim einu afleiðingum að magna sögurnar enn frekar upp. Hér kemur ein: bæjarpólitíkin er eingöngu stökkpallur fyrir mig í landsmálin,“ segir Gylfi í færslu á samfélagsmiðlum.

Gylfi hefur tekið sæti sem varaþingmaður á kjörtímabilinu fyrir Viðreisn og leiddi lista flokksins í alþingiskosningum árið 2017. Þá var hann aðstoðarmaður Benedikts Jóhannessonar fjármálaráðherra en náði ekki kjöri á þing.

Gylfi, sem er heilsuhagfræðingur að mennt og var forstjóri Heilbrigðisstofnunar Vestfjarða, leiddi Í-listans til sigurs í sveitarstjórnarkosningunum árið 2022 og er á ný oddviti listans í ár.

„Frá því ég byrjaði í bæjarpólitík hef ég rekið pólitík samvinnu og samtals. Ég vil ekki búa til óvini til að slá pólitískar keilur, bæði af því að það er óskynsamleg pólitík, en aðallega af því að lífið er skemmtilegra ef við reynum að vera vinir,“ segir Gylfi í færslunni. „Verkefnin sem ég hef áhuga á að koma til leiðar í sveitarfélaginu eru stór og snúast um velsæld og velferð, skemmtilegt líf innan og utan vinnu, náttúruvernd og atvinnu. Við höfum gengið til gagns síðustu fjögur ár. Næstu fjögur ár munu auðvitað ekki duga til að klára öll stóru málin. Kannski væri nær að tala um átta ár, eða þangað til maður er orðinn annaðhvort gamall eða þver, hvort sem kemur á undan.“